中環出更：漢奸黎赴美唱衰香港 死撐暴力示威係團結
香港近日嘅暴力示威令各行各業都受影響。被內地官媒炮轟為「叛國禍港四人幫」之一嘅壹傳媒黎智英（漢奸黎）就去咗美國唱衰香港，將近日暴力示威帶來嘅亂象形容為兩代人「高度團結」，仲聲稱一國兩制好快就會結束，真係亂噏一通，離晒大譜。
漢奸黎赴美國出席活動，仲喺活動上不斷唱衰香港，話港府建議修訂《逃犯條例》前，中央一直以釋法、取消參選人資格及政治檢控等奪去港人自由，年輕人過往一直不滿年長一輩嘅抗爭方式，今次年輕人以自己嘅方法爭取，甚至出現暴力場面，形容為兩代人「高度團結」。唔知漢奸黎係咪聽唔到社會上有幾多人大鬧暴力衝突搞亂香港呢？
公然邀請美國干預
漢奸黎又話，港人深知反修例風波係「最後一戰」，要抗爭同守護，又指內地已等唔到五十年不變，「一國兩制好快會結束」，港人嘅自由同法治都好快會被奪去喎。漢奸黎真係亂咁講、噏得就噏喇。佢仲提到，反修例活動上有示威者揮舞美國旗，係因為香港與美國同樣珍重相同嘅自由價值，望美方持續關注香港議題，展示道德上嘅支持。漢奸黎公然邀請外國去干預香港事務，仲唔係離晒大譜。
卓妮