中環出更：郭家麒嘲瞓覺 黃定光反擊爆罵戰
立法會議員黃定光（象哥）經常被發現喺會議廳瞓着覺，話說人力事務委員會尋日開會選新嘅正副主席，個會開到一半就開始嘈，事關公民黨議員郭家麒就話提名喺度瞓緊覺嘅民建聯議員象哥做主席，象哥一聽到就即刻頂唔住頸，鬧番佢「黐線」，仲話自己比郭家麒精神，仲炯炯有神添！跟住成個會就演變成罵戰，雙方駁火互鬧。
會議由梁耀忠主持，佢諗住出聲調停吓，同象哥講咁樣唔係咁好嘅，喺會議入邊要尊重對方，點知象哥指郭家麒話佢瞓覺夠唔係幾好咯！郭家麒聽完就怪番象哥，話佢常態係瞓覺，搞到見佢低頭就以為佢瞓咗覺，仲建議象哥下次寫個「我不是睡覺」嘅牌提吓大家喎。
郭向民建聯挑機遭圍攻
正當大家諗住一筆勾銷，繼續開會嘅時候，郭家麒又再鬧民建聯低劣，隨即惹起民建聯成班議員不滿，群起要求郭家麒收番冒犯性嘅說話，蔣麗芸仲激動到拍晒枱添！結果成個會大半時間都喺度嘈，仲邊度選到正副主席吖！
卓妮