政情：立會復修未完 門牌焗玩「懷舊風」
立法會大樓喺七一遭到示威者闖入並大肆破壞設施，其中位於一樓嘅會議廳前廳門口個牌都被破壞埋，最近大樓已經大致修復完成，之但係門前嘅牌就似乎換咗風格，本來一向都係將啲字鑲入去嘅，點知依家就變成一塊膠板掛喺度，似足以前五六十年代食肆掛出嚟嘅衞生提示牌。
膠板啡底金字
「會議廳前廳」塊膠板就啡底、金字，同以前啲衞生提示牌一樣，都係塊膠板上面有啲金字，做咩無端端變成咁，唔通政府最近興懷舊風？
立法會秘書處回覆查詢時就話，之前個牌被破壞咗，依家就暫時用住塊膠板代替住先，話稍後會換番喎。