政情：東華秋祭望為港帶來祥和

呢幾個月嘅示威衝突，打殘咗香港經濟，各行各業都受到嚴重影響，唔少打工仔冇咗份工，相信好多市民都想好似何世柱所講，希望香港回復安寧，但唔知幾時先可以實現呢？

秉承傳統 祈福消災

為表尊重中國固有禮教同傳揚傳統文化，東華三院每年都會舉行奉祀文武二帝秋祭典禮，藉以秉承傳統習俗，為本港市民祈福消災，而應屆東華三院主席蔡榮星同全體董事局成員都着上長袍玄褂行禮，以示對祭典嘅尊重。

其實，祭典喺一九五七年起舉辦，至今已經係第六十二屆，而蔡榮星就話中國自古以農立國，每逢秋季百穀豐收之際，都會舉行祭祀活動，以慶祝收成同酬謝神恩。