中環出更：長子結婚 甄韋喬心願了卻咗三分一
華人家庭傳統理念，子女若非成家立室，否則父母嘅責任都未算完結，所以家長都渴望下一代盡早覓得佳偶、拉埋天窗。願景基金會主席甄韋喬日前廣宴親朋，見證佢嘅長子甄偲瀚同李思佩共諧連理，攜手邁向人生新一頁，雙方家長當然係喜不自勝。
甄韋喬話長子廿多歲就結婚，以今日普遍遲婚嘅社會現象而言，自己咁快就飲「新抱茶」確實係福氣。至於港人婚嫁嘅年齡愈推愈遲，佢話可能係大家準備建立家庭之前，都設法謀得穩定嘅經濟收入，同買樓置業共築愛巢。雖然咁做係會令到對方家長放心，但嫁娶嘅日子就難免延遲。
佢又話遲結婚，婦女懷孕嘅年齡就大咗，分娩會較為辛苦之餘，產後恢復期亦較漫長。因此要兒女成群的話，結婚宜早不宜遲，而佢自己二十歲娶妻，廿一歲就做爸爸，最終成為三子之父。雖然長子早婚，新抱大有條件為甄家生多幾個，但由於二仔同孻仔仲未結婚，飲新抱茶嘅心願，目前只係了卻咗三分一。
鄭家豪：做爸爸後體會親情可貴
由於甄韋喬係香港傑青會前主席，好多傑青都獲邀出席婚宴，而傑青鄭家豪喺婚前已有周詳計劃，先置業然後再娶得美人歸，舊年因太太懷孕，搵裝修師傅將屋企嘅浴缸改為企缸，以杜絕潛在嘅家居風險，結果今年五月太太順利誕下掌上明珠，佢話男人嘅事業固然重要，然而做咗爸爸之後，就更加深切體會到親子情嘅可貴，若果可以為囡囡增添弟妹，有利下一代喺成長期中學習同他人相處之道。
陳玉桂先後赴英法影婚照
菁英會副主席黃麗芳同會員陳玉桂亦係出席婚宴嘅嘉賓之一。下個月就披嫁衣嘅陳玉桂，早前聘請本地攝影師遠赴英國影婚照，後來又依友人嘅介紹，到法國搵當地攝影師再影一輯婚紗相。佢話法國攝影師好注重同拍攝對象嘅交流，又特別懂得捕捉甜蜜欣喜嘅一刻，所得嘅婚照效果令佢眼前一亮咁話。
卓妮