中環出更：邵家臻自嘲坐監太耐 發言唔記得開咪
違法佔領行動（佔中）喺二○一四年爆發，社會福利界立法會議員邵家臻因佔中案而被判囚八個月，喺今個月初先至出獄。立法會尋日復會，幾個月冇開會嘅邵發言時就唔記得咗要開咗咪先可以發言。唔通佢坐監坐得太耐，所以唔記得咗﹖
平時立法會議員喺立法會嘅會議廳同會議室開會發言時，都要使用咪高峰先收到音，不過就由立法會職員去控制有關設備。之但係喺部分舉行記者會嘅房間，議員發言時就要自己開咗個咪，先至可以收到音。尋日一班民主派議員召開記者會，到邵家臻要發言時，佢就唔記得要開咗咪先至發言。當時坐喺附近嘅議員都提醒佢要開咪，邵仲隨即自嘲話︰「冇返嚟幾個月，唔識開咪添。」
范國威亦忘開咪 被嘲「你都坐監？」
咪以為得邵家臻唔記得發言前要開咪，緊接住邵發言嘅立法會議員范國威（Gary）亦都同樣冇開咪就發言。坐喺隔籬嘅邵見狀就問Gary︰「你都坐咗監呀？」成班議員聽到之後都大笑，搞到Gary一臉尷尬。似乎幾個月冇開會，議員都唔係幾習慣咁噃。
卓妮