政情：張華峰獲封隱性VIP舌戰擊倒一舊雲

提醒陳淑莊唔好太激動

肥老闆尋日喺會上自言一向好少發言，但都忍唔住要出聲，因為每個人發言時都有留心聽清楚，偏偏建制派議員發言時泛民就太嘈搞到聽唔清，仲話議會唔係誰大誰惡誰正確喎。佢又點名提及幾個月前接受腦部手術嘅議員陳淑莊，不過唔係鬧佢，而係善意提醒唔好太激動，擔心會對佢身體有唔好影響喇！

另一議員尹兆堅就話肥老闆呢番說話謙咗少少，仲話肥老闆其實係議會中嘅「隱性VIP」，事關發言會變助攻王，過去都爆過唔少嘢，呢啲資訊對民間社會有用咁話，似乎講緊肥老闆喺監警會會議中，意外爆出立法會議員麥美娟閉門見特首時爆粗一事嘞！

另外，肥老闆亦獲陳淑莊嘅黨友稱讚，因為佢識問候同關心同事病況，唔似得民建聯嘅人渣竟然去詛咒人喎。就咁聽落肥老闆都幾得人心，竟然喺火花四起、立場行先嘅會議室內獲另一個陣營嘅議員力讚。

講開監警會，肥老闆作為監警會副主席都落力喺會議上為監警會護航，大力反駁前監警會成員一舊雲針對監警會嘅批評，上演咗一場新舊監警會成員駁火嘅畫面。

一舊雲喺會議上批評警方用警棍扑濕晒人哋個頭，又批評做法違反晒指引，但監警會成員冇出過聲，睇唔到監警會嘅職能可以減少針對警方嘅投訴，因為現時嘅投訴個案排山倒海而來，更有涉及警方在內嘅性侵犯指控、近距離開槍、傳媒被捕等，直言如果監警會做到嘢就阻止到警察暴行，只怪監警會縱容囉。

叫黃碧雲咪侮辱監警會

聽到呢番說話，肥老闆話有真實證據可據理力爭，反指一舊雲東拉西扯，好似性侵指控未經證實就講到咬牙切齒、好似真實見到係唔應該。肥老闆又重申監警會唔係無做嘢，而係根據公義程序做咗好多工夫，亦都視察過新屋嶺，又話一舊雲唔清楚唔好亂批評。肥老闆仲話監警會針對警方嘅投訴都未作結論，唔應該現階段去批評監警會，唔好再侮辱監警會冇做嘢喎。