政情：社會撕裂 李家仁籲用愛解仇恨
反修例嘅激烈衝突持續咗逾四個月仲未停，社會嚴重撕裂，好多市民喺呢段時間心情都好差。唱《小明上廣州》唱到街知巷聞嘅香港醫學會前會董、兒科醫生李家仁日前就將兒歌金曲《寫一個愛字》拍咗個MV，希望大家都可以放低紛爭，停落嚟先。
李家仁日前喺Facebook貼文，附上《寫一個愛字》嘅新MV，MV都係由一啲舊時拍落嘅片段剪成。MV入面李家仁一時捉住一個細路女手仔教佢寫個愛字，佢又拎住個小結他喺度彈，之後又有佢派蛋撻畀幾位年輕人嘅片段，都係啲充滿暖意嘅畫面。
希望大家放低是非唔追究
拍呢段MV，當然係想帶出一啲訊息。佢喺貼文中話，希望大家一齊放低是是非非，誰錯誰對都好，暫時都唔好再追究，反正有十萬個獨立調查委員會都好，都查唔到喇，不如唔好查喇！佢仲叫大家停落嚟先，因為歲月經過沉澱，事情就會水落石出喎！
佢又話只要放開仇恨，心就會更加自然。跟住佢又問點解一定要每日都懷住仇恨過活呢？不如放低暴力，放低所謂正義嘅光環，落地啲，一齊寫一個愛字喇，無人會笑你o架！