中環出更：曾幫新移民打尖上樓 李華明被翻舊帳
政府將喺本周三宣布新一份《施政報告》，尋日一個電台論壇就圍繞呢個主題討論。立法會內務委員會前副主席李華明畀台下觀眾翻舊帳，話佢曾經幫新移民打尖上樓，而現任議員莫乃光就畀學者挑機，質問佢會唔會成為市民榜樣，帶頭信任警隊。
喺論譠期間，台下有位市民翻李華明舊帳，話香港要起多啲過渡性房屋，可惜起嚟都唔係畀香港人住，因為日日一百五十個單程證人士嚟香港，搶晒啲公屋。嗰位市民仲話記得大約十年前有本書叫《有福同享》，教新移民打尖上公屋，而書上面出現咗一位議員嘅橫額，又話：「好幸運地呢位議員今日就喺我面前」暗指李華明！
莫乃光驚警方入立會執法
另外，理大專業及持續教育學院講師陳偉強就問莫乃光會唔會支持警方入立法會執法，佢話依家啲商場都唔信任警方執法，叫莫乃光身為立法會議員要先做一個榜樣，問佢係咪驚先。莫乃光就回應話真係驚o架，因為呢四個月嚟，有唔少議員喺示威街頭畀警員針對，甚至仲拉埋添，所以議員對警方入立法會都好擔心。
陳偉強之前喺學校畀學生包圍，之後學校安排佢停一停教務先，佢話理解校方決定。佢覺得人誰無過，身為教育工作者，只要學生知錯可以畀機會佢哋重回正軌喎。
卓妮