中環出更：截肢無阻追夢 吳家榮笑對人生
殘障唔需要意志消沉，好似香港傷殘青年協會理事會主席吳家榮醫生咁，喺讀中三嘅時候確診患上癌症，其後決定做截肢手術。手術過後，佢都係冇放棄過做醫生嘅理想，康復期間喺屯門醫院受到一名醫生嘅啟發，自己亦成功當上一名殘障醫生，仲話依家都會同病人分享自己嘅人生經歷，四處撒放希望、樂觀嘅種子嚟鼓勵病人。
吳家榮仲自爆話會嚇自己嘅小朋友，同佢哋講唔聽話就會畀怪獸食咗隻腳，亦都會同佢哋講笑話「爸爸行路好辛苦，所以唔好叫爸爸抱你！」想當年佢好驚截肢之後冇得跑步、做運動，但係就話多得身邊嘅人支持，令自己可以樂觀面對人生，截肢後仲試過爬高牆，話冇乜嘢做唔到，最緊要都係調整自己面對逆境時候嘅心態。
同場見到傑出青年協會前主席張偉良同現任主席趙傑文。本身係一位退休消防員嘅張偉良，三十幾年前因一次意外而要截肢，當年佢得廿幾歲，正值當打之年，但冇咗隻腳令佢冇得落場救人，冇得再踢波、打籃球同行山。但佢冇放棄，反而喺工作上積極去學習使用一啲特殊嘅工具，最終佢成為一位消防教官。其後佢仲訓練消防員去使用呢啲工具救人，早幾年佢先退休，而好動嘅佢亦因為呢次意外，反而有機會去玩一啲以前冇玩過嘅嘢，例如划艇同划龍舟。佢話唔會冇嘢玩嘅，最重要係睇你識唔識變通你嘅心情啫！
蔣嘉琦斷骨 明白殘疾人士困難
前女騎師蔣嘉琦話做得騎師難免會受傷，斷骨就更加係「家常便飯」。雖然佢只係試過手指斷骨，但日常生活就已經好唔方便，所以更明白肢體殘疾嘅朋友面對幾大困難。咁佢幾多歲時受傷，佢竟然反問「想知邊隻手指先？」再問到咁危險，當年家人有冇叫佢退出？佢就話唔畀屋企人知囉，因為當時佢係住宿舍，難得有一件事咁有興趣，佢話一定要堅持落去！
卓妮