政情：禁蒙面法惹恐慌執法難 鄭若驊死撐擾民有限

其實，喺禁蒙面法實施後，唔止市民感到無所適從，就連立法會醫學界議員陳沛然早前都喺社交平台貼文，話若果病者強烈要求醫生寫醫生紙，醫生寫同唔寫都可能被投訴，或因而惹上官非，甚至被釘牌，可見相關規例令到人人自危。

話核實身份後可以立即戴番

鄭若驊尋日就喺網誌指出，新規例只係禁止公眾集會或遊行人士使用蒙面物品阻止識別身份，同時授權警務人員喺公眾地方要求市民除口罩或者蒙面物品以核實身份。佢就話政府已充分顧及《基本法》同《香港人權法案條例》嘅人權保障，但係表示權利並非絕對，而係可以施加限制，並已經喺權利同限制之間取得平衡，認為唔會損害市民嘅言論自由同集會自由。

佢又話市民仍然可以喺唔蒙面嘅情況下，參加合法嘅公眾活動，被警務人員要求除低蒙面物品以核實身份之後，可以立即戴番，所以新措施對市民權利嘅干擾係極為有限，而且同保障公共安全、公共秩序嘅合法目的相稱。另外，喺規例訂明嘅情況下唔可以使用蒙面物品之外，市民喺其他情況下一般仍然可以戴上口罩，日常生活所受嘅影響唔大。

針對鄭若驊嘅講法，理工大學專業及持續教育學院講師陳偉強就話，新規例對市民仍然存在影響，部分市民可能因為生病戴口罩，就算睇咗醫生，都冇可能日日帶住醫生紙出街，而且因為鼻敏感戴口罩，都唔會睇醫生啦。

學者倡局部戒嚴發清晰指引

陳偉強仲話明星出街都會遮掩身份，戴口罩或者戴太陽眼鏡唔一定係因為政治立場。佢認為政府應該實行部分地區戒嚴以配合新規例，避免戴口罩嘅市民因為路經示威現場而被拘捕，同時政府應就規例發出清晰指引。佢仲直斥話緊急法明明係「尚方寶劍」，但訂立同實施嘅禁蒙面法就「雷聲大、雨點小」冇乜作用，相信警方執法都仲係好困難。