政情：民記鬼打鬼爭新東議席
明年立法會選舉逐步逼近，其中以新界東競爭最激烈，呢個區之所以咁矚目，全因唔少建制派政團都對呢區虎視眈眈，希望插旗分一杯羹，博大霧攞多席，但當中最好睇相信仍然係民建聯嘅內鬥。
坊間一直盛傳，民建聯期望趁明年新界東會加兩個議席，希望一舉喺該區取得三席，除咗兩位現任立法會議員外，仲想力捧埋現任沙田區議員葛珮帆走入立法會，仲盛傳民記會安排現任立法會議員陳克勤獨立一條隊出選添。聽落好似好理想，但呢個如意算盤似乎就打唔響喇。
有民記內部人士透露，民記新界東嗰邊已經計過數，知道取三席係不可能嘅任務，無他嘅，北區鄉事票已經畀自由黨吸晒，加上轉戰直選嘅工聯會勞工界議員葉偉明隨時又攞走萬幾兩萬票，加加埋埋，民記要攻下三席實在係冇可能。據聞，葛珮帆同陳克勤已經開始努力爭取黨內支持，嚟緊隨時暗戰連場。