政情：中間分界金刀梁自爆年少煩惱
坊間流傳一句「中間分界，心理變態」嘅玩笑，相信令到唔少咁樣梳頭嘅人都因而被取笑過。有「金刀梁」之稱嘅醫院管理局前主席梁智鴻嘅髮型多年都係中間分界示人，自揭呢個髮型帶來嘅煩惱，唔知關唔關坊間嘅玩笑事呢？
80年來從未着過牛仔褲
金刀梁接受訪問時自爆，中間分界為佢少年增添唔少煩惱，不過就唔關朋友間嘅玩笑事。佢自爆，少年時期嘅佢不論將頭髮左梳定右梳，抑或用髮蠟、用網套住頭髮瞓覺，最終都會好唔聽話彈起，搞到鬼咁尷尬。佢仲話，七兄弟姊妹中只有佢有呢個煩惱，坦言當時自覺好陰功囉。不過，金刀梁就已經克服呢個問題，只係最怕會光頭喎。
不過，一向堅持着整齊三件頭見人嘅金刀梁就否認姿整，只係愛齊整，所以八十歲嘅佢未試過有一條牛仔褲，真係難以置信。