政情：國際活動紛取消 馬逢國憂無回頭

嘥人力物力 參加者失望

馬逢國話，渡海泳重辦之後曾經參加過兩次，原本今年都想報名參加，可惜冇時間練水，又要試水呢樣嗰樣，起碼都要提早幾個月準備，結果就冇報到名喇，但佢就話雖然自己冇影響，但見人哋冇得參加都覺得好可惜、好遺憾，仲話啲參加者一定好失望添。

佢又話，主辦機構一定唔會想取消嘅，事關喺當年重辦都好唔容易，同政府溝通咗好耐，各部門作出調動先搞得成，雖然話有人贊助，但今次搞唔成，相信都浪費咗唔少人力物力，對香港都有一定影響。例如渡海泳有國際組、挑戰組，外國參賽者一早來港準備，結果賽事前兩個星期先話取消，唔單止影響香港國際聲譽，機構冇咗個重要活動，金錢上都有損失。

打擊外國人對香港信心

馬逢國話，除咗今次渡海泳取消，最近啲單車節、美食節等大型活動都陸續取消，唔單止影響體育氣氛及發展，仲畀人覺得香港社會唔和諧，外國人對香港信心降低；佢仲特別提到今年嘅Formula E電動方程式賽事都取消埋，轉咗去摩洛哥馬拉喀什舉行，好有可能一去不復返，分分鐘一斷就斷晒，以後都唔喺香港舉辦喇！

至於梁繼昌就話，報咗名冇得游梗係好失望啦，仲話自己唔使特別為比賽操水，因為平時游水都以一千米起跳喎！而去年都有參加渡海泳嘅馮海容就話今年都有報名，對取消活動感到失望，但都冇辦法，明白室外活動要考慮安全問題。對於最近咁多活動取消，某程度對經濟有影響，會唔會有啲咩招數幫手救亡呢？馮就話有持續同業界、商界及零售相關行業接觸，睇吓有咩實質嘢可以幫到手喎。