政情：楊雪盈自爆曾被非禮 網民質疑博宣傳
荷里活知名製片人被揭喺過去三十年涉嫌性侵多位女星嘅醜聞，喺美國掀起「Me Too」運動，大量女性紛紛於網上自揭過往被性侵或性騷擾嘅經歷。八十後灣仔區議員楊雪盈日前亦喺社交網站自爆，過往亦有被人非禮嘅經歷，產生好大陰影。本月中她喺區內又遭一名男子從後故意碰撞非禮，她決定尾隨其後，並報警成功將對方拘捕。她呼籲其他女性亦唔好啞忍，並促請警方積極處理同類案件。
事後多名網民紛紛留言表示支持及大讚楊雪盈勇敢，但亦有個別網民認為楊嘅個案證據薄弱，難以入罪，警方接報後無法檢控都無可厚非，甚至有人質疑楊此舉係為咗博宣傳。
引老布殊涉「鹹豬手」事件反擊
楊雪盈尋日再於社交網站反擊，引述友人傳來嘅電郵，指早前有女性指控美國前總統老布殊涉「鹹豬手」，起初亦有不少人質疑該名女子「博宣傳」，誣衊呢位備受尊敬嘅老人家，但隨着有更多受害人挺身而出指證老布殊，輿論才開始轉向。她認為即使警方經調查後，未有足夠證據將涉案人起訴或定罪，將對方拘捕已起到警戒作用，呼籲各位曾受害嘅姊妹勇於報警。