政情：退休慢慢抖 梁廣灝唔諗去旅行
九廣鐵路公司前總裁梁廣灝喺今年中退休，早前喺一個活動撞到佢，問起退休後有冇人搵佢出山？梁廣灝就話，依家全部都推咗先，坐幾個月先，自己都七十三歲，應該抖吓，而且香港依家咁嘅政治環境，做商業嘢、政治嘢都唔容易做，話退休唔做嘢，就慳啲使囉！
覺得啲衫多得滯
佢話，自己冇乜去旅行嘅習慣，運動都冇，就連太太都唔鍾意去旅行，兩人廿年前就有去，依家就夠晒、去到夠啦，太太又覺得香港乜都有，自己依家退休，仲覺得啲衫多得滯添！
講起近日港鐵東鐵線爆出罕見載客列車出軌事件，梁廣灝都話有乘客喺裏面嘅出軌事件係好嚴重嘅，港鐵都要徹查。佢覺得，就算維修人員工作量大咗，港鐵都應該諗方法調整工作內容，安全係永遠唔可以妥協嘅，唔得就寧願停咗佢，唔好行，因為乘客坐咗上去就冇得揀。至於今次出事嘅原因，佢覺得可循操作問題同機械故障兩方面去諗，但就唔想估，因為未諗得清楚咁話。