政情：做半日伴讀書僮 田北辰得着多
做咗公公嘅立法會議員田北辰（田二少）尋日做咗半日伴讀書僮喎，唔通係陪啲孫讀書？非也。
話說田二少收咗求助個案，要親身落區解決。乜嘢咁急呀？咪就係佢搞嘅英語閱讀計劃囉！佢話有位媽咪本身喺聽、講方面有啲困難，好難教到佢K3嘅囡囡用電子書同點讀筆，好希望有人指導到小朋友，所以佢就去陪小朋友讀咗第一集故事書，而經過呢次家訪，佢嘅得着，仲比小朋友多喎。
用母語輔助小朋友學英文
佢話小朋友喺呢個階段，最緊要鼓勵佢多聽英語，同一時間多睇同故事書有關連嘅圖片，累積對語言嘅感覺，所以當初設計英文故事書時，就特登唔喺點讀筆加廣東話錄音，而計劃係畀小一同小二嘅小朋友，今年就擴展到K3。
但原來對首次接觸英文嘅K3小朋友嚟講，用點讀筆點圖後連接唔到聲音，根本讀唔到、學唔到。所以田二少諗緊喺K3階段嘅點讀筆度加番廣東話版本，用母語輔助小朋友學英文，咁小朋友都可以同時聽到英文、廣東話發音，大概明白個古仔係乜嘢意思。既然當初諗漏咗啲嘢，依家完善番佢都係件好事吖！