政情：范鴻齡唔熟醫療 高拔陞冀互補
醫院管理局行政總裁高拔陞上任就要「打仗」，講緊係打流感高峰期呢場仗！佢上任後尋日首次同傳媒茶敍，提到醫管局已經未雨綢繆，密鑼緊鼓籌備冬季流感高峰期的應對措施，包括較早前已經撥款七億元畀各聯網準備措施應對，又已經增加逾五百張病床。佢又談到新任醫管局主席范鴻齡，雖然范對臨床醫療工作認識真係唔深，但係新主席人脈廣，覺得自己同新主席可以互補咁話。
提醒前線救援「一視同仁」
醫管局較早前公布由范鴻齡接替梁智仁成為醫管局新主席，高拔陞話，梁教授本身是醫生，當然會對臨床工作較熟悉，但係范可以為醫管局帶來更多不同人脈聯繫。佢又講起自己畢業第一份工就做醫管局醫生，好處係熟悉臨床運作，但關於策略性嘅人脈或想法，就要靠新主席帶入醫管局，佢又笑言希望同新主席可以互補長短。
有傳媒亦問到反修例事件中，前線醫護應唔應該表達訴求。高拔陞認為香港是包容的社會，醫管局亦一樣，但提醒前線要保持「一視同仁」嘅專業原則，不同背景病人都應得到適切治療。