政情：鬼祟落邨派月餅 林鄭走後門羞家
修訂《逃犯條例》搞到香港社會撕裂，最近先肯跪低撤回修例嘅特首林鄭月娥自然成為過街老鼠，龜縮唔敢面向公眾。不過，唔知係咪中秋節關係，佢竟然尋日（13日）下午落咗筲箕灣耀東邨一間安老院探訪長者兼派月餅，諗住趁佳節少啲怨氣唔會畀人圍，點知幾十個街坊知道消息後，立即走去安老院正門，諗住「慰問」佢，搞到成個安老院門口都係市民同傳媒。
本報記者撞到正 G4攔住影近鏡
林鄭可能知衰費事搞場「中秋屋邨催淚晚會」，急急腳咁循後門走人，避開一班街坊。就喺林鄭離開嘅時候，本報記者就咁啱經過撞到，影到佢走後門上車敗走離開嘅畫面，但想上前影個近鏡都畀G4（要員保護組警員）攔住，更莫講話要問問題。不過，堂堂特區之首，落區都唔敢事先張揚，離開仲要走後門，試問顏面何存呀？不如搵啲建制派區議員代派月餅好過喇。