政情：多名常秘 坐擁幾層樓 鋪定路退休

翻查一眾常秘最新一年嘅申報，黎陳芷娟同丈夫、運輸及房屋局常秘（運輸）黎以德雙雙申報新增一個喺香港嘅住宅作自住用途，相信都係買咗同一幢樓，計番佢哋兩夫婦所持有嘅物業，佢哋現時持有兩個香港自住住宅，另有兩個香港住宅及一個香港車位作出租之用，亦有兩個位於英國嘅住宅用嚟收租。盛傳黎陳芷娟會退休先，而黎以德都會喺一兩年內退休，睇佢哋咁多出租物業，睇怕退休福利加埋租金，都夠佢兩公婆衣食無憂。

至於應耀康今年就申報多一個港島區住宅作自用，即係佢總共有兩個港島區住宅自用，另外亦有五分一個新界住宅自用及五分一個新界住宅出租。翻查佢去年嘅申報，呢兩個新界住宅當時僅申報由佢本人持有，唔知到底係業權有變，定係去年冇申報清楚呢？

黃灝玄英國有3個出租單位

黃灝玄去年申報有一個港島區住宅用作出租，今年就申報少咗一個港島住宅出租，但就多咗一個港島區住宅用作自住，相信佢都係將原本用作出租嘅單位變成自住。睇番佢整體申報嘅資料，佢一共有兩個佔咗五成業權嘅自住單位，亦喺英國有三個出租住宅單位，分別位於中倫敦及梅登黑德，雖然只有其中一個倫敦住宅擁有全部業權，但睇落都儲埋唔少磚頭。

新上任常秘多鍾情中港物業

過去一年都有唔少新常秘上任，根據申報，佢哋多數都鍾情投資香港同內地物業，好似發展局常秘（工務）林世雄就喺大埔有一個住宅連車位作自用，環境局常秘鄭美施就有兩個港島區出租住宅單位，創新及科技局常秘蔡淑嫻就有兩個港島區住宅，其中一個佔四分一業權，仲有一個喺中山嘅住宅，全部都自用，睇嚟都唔使以租金增加收入。