政情：失冊平調無降職 黃思文執番身彩
選舉事務處（選舉處）今年四月被揭遺失選民登記冊，卻隱瞞兩年半，喺事件中說法前後不一嘅總選舉主任黃思文被調離選舉處後，一直去向未明，成件事都神神秘秘咁。選管會「失冊」報告出爐距今一個月，黃思文去向終於塵埃落定，原來佢平調去做薪諮會聯合秘書處助理秘書長，似乎要調佢去做啲冇咁敏感嘅工作，冇降職真係執番身彩。不過相比佢上手，失冊時係總選舉主任李柏康有得「翻閹」搞選舉事務，真係同人唔同命嘞！
二○一六年立法會換屆選舉中，新界西葵青區偉盈票站嘅選民登記冊遺失後，隱瞞兩年半一直無通報，被揭發後政府才作交代，令各界嘩然。事件被揭發後，黃思文曾講過，其下屬無通知佢失冊一事，佢一直唔知呢件事，直至當時有傳媒查詢先知。
不過，選舉管理會（選管會）上月底公布有關調查報告時，顯示早喺舊年一月，黃思文已經睇過提及失冊嘅便箋，證明佢嘅講法同事實有出入，而黃思文喺選管會調查時，就話唔記得睇過嗰份便箋。對於失冊事件，選管會話事隔太耐，無法斷定幾時同點樣遺失，意味住失冊事件到底係點樣發生，可能最終都冇人知道，只知失冊後上任嘅黃思文喺上月底被調離選舉處。
前日開始上任新職位
黃思文早喺報告公布前已喺六月底開始休假，到底調去邊度？政府之前一直冇公開講，只係推說由公務員事務局一般職系處負責調派，直至近日，政府電話簿終於出現黃思文個名，原來佢被調派去做薪諮會聯合秘書處助理秘書長。據了解，佢前日開始返新職位，呢個位係高級首席行政主任，屬首長級薪級第二點，同之前做總選舉主任嘅職級一樣，即係平調，可算係執番身彩。
薪諮會聯合秘書處係負責為多個有關公務員薪酬嘅委員會提供支援服務，秘書處嘅工作包括要做薪酬有關嘅研究，都係一啲冇咁敏感嘅工作，睇落似乎黃思文短期內都唔會再接觸選舉嘞！
李柏康同失冊獲翻閹
至於失冊時嘅選舉處負責人李柏康今年五月完成退休前休假並正式退休，但早前被揭喺七月底按退休後服務合約計劃獲聘為選管會顧問，就選舉事宜提供意見，同黃思文真係同人唔同命。咁又係嘅，李柏康負責選舉處時出現失冊事件，呢啲經驗真係唔係個個有呀！