廢柴政府冇卵用 騎呢撐場輸趴街

正所謂,天生我材必有用。如果身手矯健,心如止水,可以做刺客荊軻;如果面目姣好、奶大無邊,可以做名妓蘇小小。若然面目猙獰,狂躁變態咯喎,功夫茶有份筍工推介,就係做廢柴政府嘅騎呢奇兵撐場客啦!

各位街坊,不妨擔定櫈仔聽功夫茶細說從頭。話說日前有團體不滿港台時事節目內容偏頗,於是發起「萬人包圍香港電台」行動,期間除咗高嗌「還聲於民」,又貼標語「傷港奠台」。混亂間,竟有人以粗口辱罵現場記者,更有核突中年婦伸出大條舌頭,舔本報女記者嘅相機鏡頭,咁都未夠,仲試圖咬鏡頭添,該煨!

呢下突如其來嘅冒瀆穢迹,當真嚇死寶寶!呢位大媽一係忽然失常,一係可能相機鏡頭暗藏異香,佢舌頭一舔,話唔定可交叉放電,快慰無比!

嗱,故事未完㗎。其後仲有條粉腸疑起飛腳踢傷女記者,另一名示威者則以標語撞相機,再撞向女記者右眼。喂,你班騎呢怪究竟嚟圍港台定係嚟混吉呀?群魔亂舞,槍頭亂指,成班喪屍咁,知唔知醜字點寫呀?俗語話「食屎食着豆」,你班騎呢怪連圍乜都未知,正一係「食豆食着屎」!

再講啊,港台係政府親生仔,使乜搵人又圍又叫啫,斷佢米路,唔過水畀佢,執咗佢咪冇眼屎乾淨盲囉。橫掂呢個電視台連一點收視都冇,以後每年慳番十億公帑,用嚟扶貧好過喇。

講開呢個廢柴政府,除咗哀其不幸,怒其不爭,功夫茶都真係唔知點解咁忟憎!嗱,一直走喺反中亂港最前線嘅漢奸黎,中央政法委不久前先至發文炮轟佢係「禍港四人幫」之首,力數十四宗罪!一個惡貫滿盈嘅大漢奸,人人得而誅之,點知,早前一班所謂快閃示威者去圍漢奸黎何文田大宅,既冇頭威又冇尾陣,求其Hea嗌兩句口號,唔使五分鐘就冇晒影!

喂,阿哥,𢱑痕都用啲力啊!對付「引火焚身」嘅大漢奸,起碼用大喇叭,冇一萬幾千人,最少都一千幾百人,齊齊呼喝:「×你老母」、「蒲你也摩」、「浦也摩」,震天價響,製造風聲鶴唳嘅效果啊!依家小貓三四隻,圍條毛咩!

大家睇到㗎,反對派搵人搞政府,搞得幾叻,淨係嗰班被嘲為曱甴嘅黑衣軍,隻隻活力四射,精力充沛,有組織有默契,個個星期反轉港九新界十八區。《孫子兵法》話齋,「一戰而定是真名將」,做任何事,一係唔做,一係做得徹底!今勻廢柴政府開到口話「大家都累了」,即係冇卵用、投降啫!落得只有騎呢怪撐場嘅地步,反對派睇見偷笑,曱甴睇見大笑,誰勝誰負,高下立見!