中環出更：乜運動都識啲 葉華雄：最緊要健康兼聯誼
成日都會聽到人喺體育賽事上講「友誼第一，比賽第二」，體育精神幾時都係最重要嘅，不過早前網上就流傳一段內地一場冰上曲棍球比賽，敗方出手攻擊勝方嘅片段，香港菁英會體育研究會主任葉華雄都有睇到，話自己雖然冇玩冰上曲棍球，亦聽過冰上曲棍球係有打架呢個文化，但應該都有一定嘅限度，所以見到片中啲人係咁打都覺得誇張！
葉華雄又話自己乜嘢都有玩，包括籃球、足球、羽毛球等，雖然唔算好精，但乜嘢都識少少，佢覺得體育比賽最重要係聯誼同埋保持自己身體健康，所以佢平時參加各類比賽，都會盡力比賽，然後不論誰輸誰贏都覺得開心。佢仲話最近組咗幾個人一齊喺周末跑山，然後再游水，不過似乎強度太高喇，嚟緊要諗一啲較為輕鬆嘅活動，咁先可以吸引多啲人參加喇。
講起運動，菁英會金融研究會主任周雯玲都話最重要係挑戰自己，所以佢嚟緊十月會去日本參加人生第一次嘅全馬馬拉松，佢話並唔係第一次衝出香港，過往曾經都喺北韓、澳門等參加長跑，但最多都係跑半馬，全馬就係第一次，所以冇定目標時間，希望順利完成就好。不過，佢話日本嘅馬拉松氣氛好好多，沿路又有當地水果、拉麵等食物提供，相比之下香港嘅馬拉松要跑完一大段路先至有小量水果，遜色咗啲喎！
丘雪祺嘆港人着衫較保守
做運動當然要有相應裝備，時裝設計師丘雪祺就提到早幾年日本有啲山系服裝流行，但似乎就冇乜傳入香港，佢形容香港人較保守，相比於內地，近年內地唔少男裝都可以加入女裝元素，如着裙，或者顏色好鮮艷等，如果套落香港就可能會畀人話「易服癖」，而女裝方面，佢甚至試過幫一個女商人設計一套透視裝，點知對方收貨覺得要裏面唔打底先至更靚，可見尺度比香港普遍大好多喇！
卓妮