中環出更：8.3公斤重裝「行街」陳沛然驚喜減磅

最近示威遊行不斷，相信好多人冇乜事都唔會出街。但係立法會醫學界議員陳沛然（Pierre）反而話自己呢排鍾意成日行街，日前喺社交平台上傳咗幾張全副裝備嘅相，話行街嗰時用喎。其實行街係假，救人係真，唔少人已經多次喺示威遊行嘅現場見到Pierre照顧傷者啦！

Pierre喺社交平台show晒啲裝備出嚟，包括咗單車專用頭盔、踢波專用波衫、游水用嘅泳鏡、行山用嘅口罩同埋反光衣，仲話自己有委任證添！咁多裝備都未夠，Pierre仲有個醫療背囊，佢話足足有8.3公斤！

買咁多裝備都應該使咗唔少錢，但佢就話係為咗興趣，自掏腰包添置醫療裝備都不在話下。佢仲話多得近呢兩個月做多咗負重運動；加上食冇定時又少咗吃飯，體重輕咗3公斤，行街救人之餘仲成功減磅，簡直係雙倍驚喜。

有啲網民大讚佢係陳俠醫、專業好醫生，但係亦都有網民擔心佢嘅安危，勸佢記得喺頭盔同反光衣上面寫番醫生兩個字，同埋多畫兩個十字喺左右兩邊，費事畀人認錯。有網民就回應，其實着運動衫係好平常。都啱嘅，Pierre都講過自己嘅正職係足球員、興趣係做醫生嘛！

卓妮