中環出更：網上睇片學煮雞胸 吳永嘉險失手
廠商會立法會議員吳永嘉、香港品牌發展局主席黃家和等人尋日應邀到維園工展會，示範善用廚餘炮製佳餚，其中吳永嘉話，自己煮嘢食嘅經驗唔多，知道要落場後就喺網上搵低糖、低鹽、低油食譜，睇咗十幾條片終於決定煮最容易、最穩陣嘅雞絲鴻喜菇，其實就係將啲胡椒、蛋白搽落啲雞胸肉後，用熱水將啲雞胸肉浸熟就得。
示範廚餘變佳餚
不過，唔好以為呢個菜式睇落簡單，其實都差啲失手，事關吳永嘉煮緊嘅時候，廠商會候任會長吳宏斌過咗嚟睇，仲一度想揭開個煲蓋，好彩吳永嘉發現得快，及時阻止，如果唔係就可能煮唔熟喇！吳永嘉其後補充，平時食雞通常係雞翼、雞髀都比較搶手，雞胸成為廚餘嘅機會較高，因此，佢今次煮雞胸肉就想話畀大家知，其實雞胸都可以好好食！
同場嘅黃家和透露，自己間唔中都會煮嘢食，今次為咗配合善用廚餘嘅主題，揀選咗火雞骨、紅葱頭等經常成為廚餘嘅食材嚟整雜菜湯，之前仲專程入到元朗嘅街市，同啲菜檔檔主拎咗啲佢哋唔要嘅「菜頭菜尾」嚟煮喎！
卓妮