中環出更:放寬海外醫生註冊草案 蔣麗芸催政府盡快決定

本港醫護人手緊絀,立法會議員蔣麗芸(Ann)早前提出私人條例草案,修訂現行《醫生註冊條例》,建議喺一定條件下准許取得有限度註冊嘅海外醫生豁免考試及實習。Ann話,政府原本六月應該回覆批唔批准呢條草案,但到依家都未覆,希望當局快啲覆佢,咁佢就可以趁暑假早啲排期上立法會,其他議員又可以早啲研究提出修訂,因為呢啲都需要時間o架。

游說醫學會會長支持

有關草案建議一名非本地培訓醫生,如已獲醫管局聘請兼獲醫委會作有限度註冊,並在醫管局工作不少於五年,再獲局方證明其工作令人滿意,就可獲「正式註冊」資格,毋須再喺香港通過執業資格試及實習。

Ann近日喺社交網站透露,曾拜會醫學會會長何仲平,簡介自己提出嘅草案。佢回覆查詢時指,政府仲未覆佢批唔批呢條草案,惟有自己趁暑假爭取時間,主動拜會病人團體、醫生團體等,游說佢哋支持呢條草案,亦希望聽吓大家嘅聲音,依家唔少市民排專科要排幾年,真係水深火熱,小病都等到變大病,政府又唔覆,惟有自己做到幾多得幾多啦!

卓妮

第一手消息請下載on.cc東網iPhone/iPad/Android/Windows Phone Apps