政情:蔡若蓮 不退教聯只退教協 中立性再惹質疑

近期流行講政治中立,不過唔知又有幾多政府高官堅守到呢個原則呢?好似教育局副局長蔡若蓮,佢上任時已經被外界質疑立場親建制,過往一直都保留香港教育專業人員協會(教協)及香港教育工作者聯會(教聯會)嘅會員身份,前者政治取態傾向泛民,後者就親建制,咁睇落就比較中立啲。不過根據蔡最新一份、今年七月一日嘅利益申報,佢已經唔再係教協會員,不過就仲係教聯會會員,唔通蔡因為已經做咗政府官員上晒岸,所以唔需要再表現出中立?

稱因教聯唔使每年續會

蔡被外界指係親建制,原因係佢曾經做過教聯會副主席,亦做過被視為親建制嘅福建中學(小西灣)校長。佢出任副局長前,就辭咗教聯會副主席一職,僅做會員,根據其以往申報,佢亦有保留教協會員身份。外界估計,佢都係想令自己嘅觀感好啲,顯得比較政治中立,不過依家退出教協,而繼續留喺教聯會,點睇都會再次惹外界質疑。

教育局回覆查詢時就解釋,教協需要每年續會,鑑於教協會員多數係在職教師,蔡亦已經離開校園一段時間,所以決定唔再續會,依家已經唔係教協會員。至於點解只退教協而唔退教聯會,局方指,教聯會唔使每年續會,所以有保留會籍。其實如果蔡要退出教聯會,相信都唔會冇渠道處理。唔通佢覺得公眾觀感唔重要,所以唔打算處理?

至於教協副會長田方澤回應指,教協作為工會,原則上都只係團結業界爭取權益,如果蔡喺理念上有唔同,或者換咗位置後,覺得唔適合繼續留喺教協,因而離開,教協都會尊重佢嘅決定。但對於蔡只退教協,而冇退出教聯會,田就指,有關做法會令外界質疑蔡有所偏重,認為公職人員應當較為中立,如果同時退出教協以及教聯會,喺公眾觀感上會較好。

申報日期亦同樣有疑點

仔細睇番蔡嘅申報,當中其實仲有其他疑點,蔡喺去年七月一日嘅申報入面,有提到自己係教協會員,之後成年都冇更新過,直到今年七月一日就冇咗,所以唔知確實退出嘅日期。不過聽聞教協嘅會籍有效期係按學年計,即由每年九月一日至八月三十一日,田亦指出多數係臨近九月先會處理續會一事,所以若果蔡係今年期滿唔續會,理應申報教協會籍至八月底,不過,教育局斬釘截鐵話蔡已唔係教協會員,咁到底佢有冇提早退會,定係早在去年已經冇及時更新佢份利益申報,就不得而知喇。

第一手消息請下載on.cc東網iPhone/iPad/Android/Windows Phone Apps