中環出更：徐晉暉罕見波衫Look現身 踢波讚對手好厲害
暑假梗係外出玩暑期活動啦！香港中華廠商聯合會（廠商會）尋日都舉行一場七人足球賽，廠商會作為主辦單位，當然有代表隊參賽啦，其中最估唔到嘅係，見親都係着西裝嘅副主席徐晉暉（Marvin）都有份落場踢，卓妮都係第一次見佢着波衫咋！
Marvin話，自己細個讀書時，已經開始踢波，大個去咗外國讀書，但返嚟香港都仲會同中學師弟踢波，經朋友介紹，仲識到啲啱啱畢業嘅大學生，一齊組隊參加出面嘅聯賽，切磋下球技添。
講番尋日嘅比賽都有唔少趣事發生，好似青委會副主席黃浩鈞（Howie），未開波前就跑咗出去，發覺原來佢帶錯咗鞋，搵咗一段時間都搵唔到合適嘅鞋，結果就由隊友、菁英會副秘書長潘偉業借咗對鞋畀佢先搞得掂咋，真係聽落都替佢心急！
施榮懷囝囝都有落場
尋日另一個亮點就係永遠名譽會長施榮懷（Irons）個仔施仲樂（Eric）都有落場踢，Irons話，Eric身形好過佢，但就唔夠佢好波喎。唔知兩父子平日係咪成日切磋球技呢？
此外，廠商會代表隊中，仲有個高高大大嘅龍門叫陳逸謙（Vincent），卓妮細查下，發現佢係「外援」，並唔係廠商會嘅成員嚟，Howie話，就嚟踢Vincent入會喎！Vincent講起，曼聯傳奇門將彼得舒米高係佢偶像，所以自己踢波多數都係揀守龍門。
結果尋日場波，佢哋頭場以○比六大敗畀江門隊，比賽後，大家大讚對手整體實力好平均、好有默契，中場指揮官派波一流，好佩服對手咁話。睇嚟友誼第一，比賽第二呀吓！
卓妮