中環出更：社企要掌握自負盈虧 廖珮而：比申領資助更健康
好多商界老手都會慨嘆生意難做，不過經營一門社會企業，就更艱難。社會企業研究院尋日假浸會大學，舉行院士榮譽資格及獎項頒獎禮。研究院嘅總幹事廖珮而認為社企要掌握自負盈虧之道，總比申領政府資助，來得更加健康同長遠。
廖珮而話好多社企以出售產品或服務嚟換取營運資金，香港有部分社企亦好依賴政府嘅資助，其實外國嘅社企亦會藉着上巿集資以強化自己嘅生存能力，儘管上巿嘅企業要為股東謀取利益，同社企嘅初衷似有矛盾，但從另一角度嚟睇，上巿嘅社企之所以受到投資者垂青，就好似買綠色債券一樣，係追求社會嘅改善而並非着眼於單純嘅金錢回報。
李慧芬有買社企產品表支持
不過社企要上巿成功，佢話前提係本身都要有相當嘅實力。所以無論有否集資渠道，社企都要設法優化自己嘅營運能力，而社會企業研究院嘅成立，就係為本地嘅社企，提供商界及學術團體交流嘅機會，從中吸取經營同管理心得。
講番今次嘅頒授院士榮譽名銜，共有四十五名傑出領袖獲得表揚。香港中華廠商聯合會常務會董李慧芬就係其中之一。佢話廠商會每年一度嘅工展會，都會預留十個攤位提供畀中籤嘅社企，而佢亦有購買諸如手工梘嘅社企產品以示支持，而消費者之所以光顧社企嘅產品或者服務，良心消費係原因之一，但社企都要面對巿場競爭，因此研發具自家特色嘅產品同服務，社企先至可以站穩腳跟。
青年工業家江浩榗雖然經營私人企業，但講求利潤之餘亦不忘環境生態。佢話將物料循環再造，其實亦要耗用能源，因此佢選擇耐用嘅物料來生產廚具，更符合愛護地球嘅原則。
卓妮