中環出更：嘆政府不做事 陳健波：隨時慘過沙士
近期香港示威不斷，連續幾個周末都出現大型示威同衝突，或者已經有唔少人對催淚彈、橡膠子彈變得麻木，都咪話唔令人痛心。立法會保險界議員陳健波（波哥）尋日就上載短片講感受，大嘆各行各業都受到影響，仲話有機會慘過沙士喎。
波哥講到現時香港愈嚟愈亂，經濟都開始衰退，失業率都有機會上升，所以市民嘅收入有可能下跌。仲記得二○○三年沙士時市道有幾慘淡，波哥就喺片中重提呢段時間，好彩當時有政府同埋醫療界努力，研究出對抗方法先無事。
提醒處理情緒要持盈保泰
雖然當年最後無事，但波哥就話當時係天災，今次係人禍，全因政府唔做嘢而反對派又不斷做嘢，最終搞到香港呢個屋企跌落深淵囉。佢仲似乎對政府有好大不滿，直指政府要誠心反省、勇於面對，又講到香港形勢兇險，提醒處理情緒同財務都一樣要持盈保泰、保存實力同心存希望，希望大家可以廣傳呢個訊息。波哥用番老本行去叫人保持正面，唔知其他人受唔受落呢？
卓妮