政情：公民講場：貪曾累街坊 乞見教宗 愈揭愈臭

「貪曾」前特首曾蔭權爵士涉嫌干預司法以乞求會見教宗醜聞愈揭愈臭，牽涉嘅前朝同現屆政府官員亦愈來愈多，先係現任運輸及房屋局常秘栢志高，被指喺出任香港駐歐洲聯盟特派代表同意大利政要進行「魔鬼交易」，以阻撓移交涉及意大利前總理貝魯斯干尼嘅詐騙案資料，換取對方安排貪曾見教宗。到尋日又爆出，栢志高可能已向當時嘅律政司司長黃仁龍轉達有關要求。而時任天主教香港教區主教嘅陳日君，喺盲撐貪曾時又「鬼拍後尾枕」，證實教區曾經兩次幫貪曾搭路見教宗。貪曾為求一己私慾，不但自己搞到一身蟻，依家仲愈燒愈多人，真係累街坊。