政情：余德寶餵木蝨怒轟政府無視問題
最近木蝨為患，搞到好多基層市民冇覺好瞓，甚至被迫要瞓出街。油尖旺區議員余德寶（木蝨寶）早前向政務司司長張建宗下戰書，挑戰佢一齊瞓木蝨單位，木蝨寶尋日仲親身去餵木蝨，怒轟政府當木蝨問題唔存在。
木蝨寶上個禮拜探訪一名長者，長者家中嘅地板有過百隻木蝨爬行，床邊同牆身亦布滿木蝨，於是喺區議會圖文並茂講咗畀食環署同房屋署聽，以為佢哋會幫手跟進。點知尋日佢再上去睇過，情況冇改善之餘，仲見到木蝨擴至對面嘅單位，而其他鄰居都覺得好擔心，佢仲話本身木蝨已經好得人驚，政府唔理仲得人驚。
企喺門外都畀木蝨咬
佢仲話跟咗滅蝨呢個問題六年，唔知好彩定唔好彩，冇被木蝨咬過，但尋日嘅情況嚴重，佢只係企喺門外已經被兩至三隻木蝨爬上鞋，仲咬咗佢，嗰時佢唔單止痕癢，仲好嬲、好無力，仲鬧爆政府去咗邊？
早前佢向張建宗挑機瞓木蝨單位，上個禮拜已將挑戰升級，向特首下戰書，但統統都石沉大海，毫無回音，真係好似佢話齋「政府去咗邊？」