政情：藥石亂投息民憤 政策局被迫提早交功課

修例風波影響 深層次矛盾爆發

過去幾年公屋輪候時間愈來愈長，人工又冇乜點加，樓價亦升到嘭嘭聲，普通打工仔對未來逐漸睇唔到希望，但政府政策往往都係冇新意，以「高大空」為主，好似活喺平行時空當中。經過上月修例風波影響，大家將以往對政府嘅不滿一次過爆出嚟，更因為意見不同、無大台等因素影響下，市民之間已形成絕對對立面，互相不代表大家，人人都有發聲權。

喺呢個咁亂嘅局勢，運輸及房屋局局長陳帆突然高調交功課，其中上周四下晝兩點半左右，新聞處出稿話陳帆喺四點半見傳媒，公布延誤多年、醜聞不絕嘅港鐵沙田至中環線喺明年首季會率先啟用顯徑、鑽石山擴建部分、啟德共三站，以回應附近居民要求局部開通嘅訴求。而到周日政務司司長張建宗亦透過網誌公布，扶貧委員會上周二通過兩項過渡性房屋項目，約一億一千萬元撥款，透過改裝閒置非住宅樓宇同組裝合成建築技術，增加過渡性房屋供應。

原定年底公布沙中線局部通車

綜合多方消息，其實運房局好早已研判緊局部開通沙中線嘅可能性，至近幾個月已計劃年底先公布詳情，可以喺較接近開通時間先至講，確保萬無一失；同時當局亦一早搵到地建造過渡性房屋，同各持份者保持溝通，但本來就未有打算咁早公布。另有建制派話，政府內部已要求各個政策局提早交功課，重新檢視有乜政策可以提早出台，甚至可以做，「起碼畀啲嘢出嚟」，希望市民條氣會順啲喎。

市民渴求上樓，亦希望出入方便，沙中線同過渡性房屋計劃都係正中市民下懷方案，但環顧過去一星期社會輿論，市民關注係各區遊行、暴力衝突、高官發言，對於兩個大型民生項目冇乜反應，情況就好似食藥食到「純咗」，有耐藥性一樣。政府打算用民生議題搶輿論，只係藥石亂投，繼續未能對症下藥！