政情：社會動盪馬清楠籲對話解決爭拗
日前咁啱喺中環見到保良局主席馬清楠同朋友打招呼，之後傾咗約十分鐘就離開。當時佢手拎住個袋，走去同佢打招呼問佢去邊？佢話食完飯打完網球後，依家返公司繼續工作！佢話雖然工作繁忙，但一有時間就去做運動放鬆吓，事關開始年紀大，唔做運動唔得。
問佢點睇依家香港發生嘅事？佢話自己熱愛香港，所以見到依家環境成日有爭拗都好唔開心，佢希望各方可以用對話解決爭拗，因為年輕人好多都本性純良，聽吓佢哋嘅心底話係一件好事，佢仲講到自己嘅親身經歷，話有時坐港鐵，入到車廂後有好多青年人都會主動讓座畀佢。
對香港未來充滿信心
佢仲話香港人有乜嘢風浪未遇過，一個彈丸之地有今日咁嘅成就證明香港人拚搏精神有幾犀利，係打不死嘅，又形容香港依家就好似身體有少少毛病，當痊愈之後一樣咁輝煌，對香港未來充滿信心。