政情:唔信登月陰謀論 梁偉明:懷疑非壞事

儘管五十年前月球就已留下人類探索宇宙嘅足印,然而同登月有關嘅陰謀論,一直都甚囂塵上,一直有人懷疑人類當年未有登陸月球。不過,太空館館長梁偉明就唔信呢啲陰謀論,相信人類確實到過月球喎!

梁偉明曾多次率領參與「少年太空人體驗營」嘅中學生造訪內地航天工程,咁多年來到底有無學生同佢討論登月嘅謎團呢?佢就話無,不過同事間就曾經探討過呢個問題,自己就相信人類有去月球。理由係美國雖停止派遣太空人踏足月球多時,但當年阿波羅計劃喺月球表面遺下嘅着陸器,後來嘅繞月衞星仍然拍攝得到,況且登月陰謀論者提出嘅質疑,好多都得到科學家嘅解答。

「猜測止於確鑿證據」

佢又話,具有懷疑精神並非壞事,不過一切猜測都應該終止於確鑿嘅證據。講起探索月球,佢期望本月底能夠到訪北京國家天文台,睇吓嫦娥計劃傳回地球嘅月面數據同影像。

第一手消息請下載on.cc東網iPhone/iPad/Android/Windows Phone Apps