政情：讀同一間補習社 何啟明鄧家彪係師兄弟
立法會勞工界議員何啟明喺社交網站貼出一張同勞工顧問委員會勞方委員鄧家彪嘅合照，仲話二人都係舊生添，唔通佢哋係師兄弟？原來佢哋出席一間補習社嘅三十周年晚宴，何啟明話，同阿彪依家喺工聯會係黨友，當年又讀過同一間補習社，雖然不同分校，但係都好有緣分。
何話，由中二到中六都喺油麻地分校補習，當年仲係上真人堂，唔係依家播帶，正正因為真人教，所以當年要閃避老師眼神，以免被人叫答問題，平日喺學校唔識答問題已經被人寸，費事補習又再受多次傷害嘛！當年補習完英文同數學，成績都唔錯。
阿彪就話，自己係中四、五喺嗰度補習嘅，家姐話好，所以自己又去補，買個安心，都成廿幾年前嘅事喇，當年補完習會喺元朗食涼粉再返屋企。問佢驚唔驚被補習老師問問題，佢又話唔怕，因為補習老師冇乜威嚴，通常風趣啲，又會講吓題外話，都係集中研究考試多啲。