中環出更：影靚相無所不用其極 李秀恆掉低太太
今時今日人人拎住部手機，隨手都可以影到相，不過對於「影相發燒友」嚟講，影張相就絕對唔係撳個掣咁簡單！好似香港中華出入口商會副會長李秀恆最近就出咗本攝影集《節慶》，喺發布會上分享攝影心得，話自己為求影靚相無所不用其極，例如西藏每年都有一個吸引成三十萬人爬上山觀賞嘅活動，就係將一張大型唐卡擺上山上曬太陽，自己有次趁住呢個時間去到當地，被市長邀請同佢一齊睇時，正正就喺市長對面擺支腳架影相，擋住市長欣賞大型唐卡嘅視線！
李話，曾經為咗影一張高空拍攝嘅相，特登去租架直升機飛上半空影。其實依家航拍技術愈嚟愈好，想喺半空影番落嚟，應該唔使再咁大費周章？原來唔係！李話都有試過航拍，但航拍影出嚟嘅相，一旦放大就會起格仔，所以都係要飛上去用相機影先至得，可見李對影相嘅要求真係好高啊！
中華出入口商會榮譽會長莊成鑫就話，自己十多歲就開始玩相機，可惜影到三十幾歲時，因為工作太忙少咗影，不過佢就講起舊年同李秀恆一齊去青海鹽湖，當時對方影個湖影極都唔滿意，直到晚飯時，李突然就同莊講：「大哥，麻煩你聽日幫我照顧埋我太太，我租咗車上山影湖，影完會合你哋。」原來李發現另一邊山上有間酒店，覺得喺嗰邊影一定靚，於是決定一個人衝上去影，就咁交低個老婆畀佢，搞到莊都不得不話李影相真係好投入、好入迷。
林貝聿嘉：都係菲林相機好
廣東社團總會永遠榮譽主席王國強都好鍾意影相，好多年前已經會隨身袋住個相機仔，不論係人係景，總之覺得靚就會影，不過依家多數用手機影，仲話影吓影吓，手機入面已經有幾萬張相添！至於香港各界婦女聯合協進會前主席林貝聿嘉就始終覺得菲林相機有好處，事關菲林影完會揀啲鍾意嘅曬成大相，而且揭相簿嘅感覺好唔同，唔似得依家用電話影影影，但影完都未必會再睇嘞。
卓妮