中環出更：政府癱瘓 兩局長趁機放大假
近排立法會遭受嚴重破壞，審議唔到議程，而政府都陷入癱瘓，啲問責官員又成日縮埋唔出嚟，唔知係咪因為近期一動不如一靜，冇乜嘢做，咁啱政制及內地事務局局長聶德權同發展局局長黃偉綸喺呢個時候「前後腳」放假。唔通兩位局長特登趁立法會提早放暑假，既然無會開，於是都放吓暑假先喇？
黃偉綸抖足半個月
根據有關文件，聶德權喺剛剛過去嘅星期二已經開始放假，到下星期一就復工，即係放咗個六日嘅短假期，期間由政制及內地事務局副局長陳帥夫署理職務。至於黃偉綸就放一個大暑假嘞，佢喺下個星期六開始放假，放足約半個月咁多，一直到下月十二日才復工，真係「叉足電」先返工，期間發展局副局長廖振新會署任。二人嘅假期「前後腳」完全冇重疊，唔知事前係咪夾過呢？
依家政府陷入癱瘓，好似乜都做唔到咁，都難免令啲問責官員心郁郁，想放咗假先嘅，但係講真嗰句，既然社會有咁大危機，乜都做唔到，係咪應該諗吓計解決，而唔係顧住走去放假呀？
卓妮