政情：羅致光IQ160 美術科肥佬
勞工及福利局局長羅致光IQ（智商）高達一百六十已經係眾所周知，不過智商高又係咪一定成績好呢？羅致光尋日出席活動時，自爆讀書時都曾經試過唔合格「肥佬」，仲係佢讀書生涯中，成績表唯一出現過嘅紅色添。而呢一科原來就係中一時嘅美術科喇。
因為三維觀察表達遲緩
羅尋日出席一個展能藝術家嘅作品聯展，期間佢就講起自己試過美術科「肥佬」，又話因為當時係考寫實畫，而自己三維觀察同表達都有少少遲緩，所以就考起佢喇，而佢直到中五先至明白呢個原因。
羅睇緊畫作期間，就有藝術家用手語同佢介紹畫作。羅就話，自己都睇得明啲手語，唔通佢有學過？羅就解釋，平時出席活動同睇電視時，都會學到一兩句手語，所以當藝術家介紹畫作時，同時睇埋對方嘅眼神同手勢，就睇得明少少喇。而羅又大讚其中一幅畫白泥日落嘅畫畫得好，佢話，通常睇日落嘅心情都係開心嘅，而呢幅畫嘅顏色對比做得好好，完全表達到開心嘅情況喎。