政情：葉建源講故事 梁紀昌兩個孫聽到瞓着
教育界立法會議員葉建源尋日出席一個講故事活動，仲係佢頭一次做「講古佬」添。而佢就揀咗一本名為《醜小鴨與黑小兔》嘅繪本故事書同在場嘅小朋友分享。鮮魚行學校前校長梁紀昌都帶咗兩個孫去捧場，點知佢兩個孫聽咗幾分鐘就瞓着咗。梁事後就話，通常大人講故事畀小朋友聽，其中一個目的係想小朋友快啲入睡，葉講故事期間佢兩個孫都先後進入夢鄉，所以葉講故事實在非常成功咁話。真係唔知梁係讚緊葉，定笑緊葉喇。
原來係行咗一日書展太攰
梁就解釋佢只係講笑啫，事關佢兩個孫已經行咗一日書展，太過疲累，所以先至瞓着咗，其實葉同小朋友講古仔嘅技巧算係唔錯嘅。佢又話，由於男士嘅聲線較為低沉，所以講故事效果始終唔及得女士好。而家長唔好以為重複講同一個故事會生厭，實情係小朋友都好鍾意家長同佢哋講故事，所以會百聽不厭。
葉就話，無論家長定係政界人士，都應該掌握講故事嘅能力，但政治人物講故事嘅對象換咗小朋友，就要施展另一套講故事技巧喇。唔知葉又覺得自己嘅講故事技巧點呢？