政情:踩場抗議譚文豪 傅振中反被圍

十多名巿民尋日自發到橫頭磡邨立法會議員譚文豪嘅辦事處示威,指摘佢喺旺角嘅警民衝突中,故意置身警方防線,阻礙清場行動。當手持「阻差辦公」標語嘅示威者,喺譚嘅辦事處門外高呼「抽政治油水,煽學生犯法」等口號時,約廿餘譚嘅支持者即場報以噓聲,亦有人上前奪去示威者嘅標語丟喺地上又不斷指罵對方「唔好搞亂檔啦,我哋呢度好和平o架」、「走啦!無人支持你呀!」

雙方對罵 傅噓聲中敗走

示威人士同譚嘅支持者對罵,更將有份參與自發示威嘅傅振中包圍,佢隨即終止示威行動,喺一片噓聲中率眾撤走,而譚文豪則尾隨在後話歡迎示威者表達意見,又話「有冇旅遊巴呀?若果對方唔找數,勞資關係嘅問題可以隨時搵我傾。」

事後譚文豪回應有關阻差辦公嘅指控,話○五年終審法院有一案例,任何人士向警務人員查詢或了解其行動,並唔構成阻差辦公。倘若執法者唔明白巿民有咁嘅權利,就好容易會造成不必要嘅衝突,而嚟示威嘅人士亦似乎唔大了解阻差辦公嘅定義,所以佢好樂意同示威人士好好解釋喎。

第一手消息請下載on.cc東網iPhone/iPad/Android/Windows Phone Apps