政情：囡囡畫作揚威國際 全靠父蕭俊謀餵蚊
為咗贏在起跑線，好多家長都安排小朋友學好多嘢，但有時逼唔嚟，最緊要係講興趣，可能會有更好嘅發展。好似博愛醫院前主席蕭成財（財哥）咁，佢六歲嘅孫女蕭得悅（Jaycee）原來係一名「小畫家」，啱啱喺日本神奈川世界兒童藝術雙年展中奪獎，揚威國際呀！
財哥嘅兒子蕭俊謀係博愛嘅前總理，到底囡囡Jaycee嘅作品畫咗啲乜嘢呢？原來Jaycee嘅作品嘅靈感係嚟自爸爸蕭俊謀，因為爸爸經常畀蚊咬，所以佢就將爸爸嘅表情畫出嚟。咦！囡囡攞獎都多得爸爸餵蚊喎，同時亦都反映香港蚊患幾咁嚴重。
一家人飛橫濱睇攞獎
早前蕭俊謀仲同家人一齊到橫濱睇Jaycee攞獎添！而相關作品由今個月至明年三月，會喺日本十五個地方展出，之後再到世界各地巡迴展覽，真係可喜可賀！