班費過千萬逐鹿港超 愉園青春風暴最緊要育苗
新季初戰港超聯的老牌球會愉園昨日假九龍灣公園足球場舉行開操拜神儀式，一眾職球員悉數亮相。完成儀式後，愉園體育會足球部主任陳志實受訪時透露球隊今季班費約1千多萬，期望年輕球員得到鍛煉機會，他日能入選香港隊，甚至挑戰更高水準聯賽。
愉園作為港超新軍，足主陳志實未敢好高騖遠：「第一年希望企穩陣腳先，因為球隊九成都係年輕球員，我哋想畀多啲機會佢哋，等佢哋累積多一兩年經驗。」他又指：「我哋有新3年計劃，希望慢慢打起佢哋，第一季我唔想畀大家太大壓力，冇設定一個具體嘅名次目標，踢波一定想贏，但要一步一步嚟，好似上季初級組足總盃，開頭都冇定目標，每一場都搏盡，呢班後生仔都好畀心機。」
新球員方面，球隊簽入屠俊翹、艾度古斯、林毅東、簡嘉亨、翁煦濤、黎培基、伍家揚，本地球員班底已定，外援則另有3位西班牙兵試腳，分別為中堅尼比拉斯（Denis Nieblas）、中場當比亞（Amadou doumbia）、前鋒加維蘭（Manuel Gavilan）。談到主場分配，陳志實坦言若根據上季排名順序，球隊主場只能選擇屯門鄧肇堅運動場或小西灣運動場，他亦明言希望採用位於市區的球場，如深水埗運動場、斧山道運動場，以方便球迷入場觀戰。
鮑Sir：踢法穩守有活力
陳志實早前曾公開表示會在南沙覓地興建基地，然而他昨日透露計劃有變：「我哋可能會同趙達裕足球學校合作，嗰度有4個11人場，係一個集訓基地，可能去嗰度進行季前集訓，又或者季中拉隊上去做封閉式訓練，不過唔係長駐訓練基地，因為愉園係本地球會，我哋一定係扎根本地先。」問及足總有否要求愉園繳交保證金時，陳志實稱沒有收到這個要求，同時認為作為球會應盡量避免欠薪：「培育青年球員但又拖佢糧，點都講唔過去。」
新季擔任主教練的鮑家耀稱，新季踢法會以穩守、有活力為主，亦希望透過季前熱身賽讓球員適應港超聯比賽速度。球隊將於下周五（26日）與冠忠南區「拍跳」，隨後約戰香港飛馬，並預計於8月中到東南亞集訓，惟目前仍在安排當中。
屠俊翹揚言首戰零失球
新加盟愉園的屠俊翹昨日亦有出席開操拜神儀式，這位門將寄望球隊新季有個好開始：「始終新升班，好多球員都冇踢職業聯賽經驗，所以開好個頭好緊要，打後嘅路會易行好多，希望第一場做到零失球。」
球隊新季留用升班功臣鍾偉豪，「翹叔」屠俊翹認為對自己來說是良性競爭，會付出120%操練以獲得教練信任，並協助球隊留班。6月曾到西甲球會雷加利斯跟操的「翹叔」，更將這次體驗與愉園年輕球員分享：「最緊要有決心同鬥心，我希望能夠身體力行去感染佢哋，講係冇用，做出嚟個說服力大啲。」去季效力夢想FC的「翹叔」透露，前東家仍有拖欠其工資，期望這件事能早日告一段落。
何彥霆、陳焌鏗報道