政情：梁美芬被鬧奴隸 黃定光捉手仔安慰
立法會經常唇槍舌劍，充滿火花，尋日立法會議員梁美芬（鼠王芬）就喺立法會會議期間先後被斥係「奴隸」同「奴才」，鼠王芬當然嬲爆，進出口界立法會議員黃定光（象哥）就捉住鼠王芬手仔安慰，究竟鼠王芬係畀邊個鬧呢？
泛民拒收回侮辱性言論
話說尋日開會期間，法律界議員郭榮鏗（Dennis）先後以「奴隸」及「奴才」指罵鼠王芬，立法會主席梁君彥裁決有關言論係冒犯及具侮辱性，要求收回言論，Dennis拒絕，終被趕出會議廳。多名民主派議員上前包圍Dennis兼繼續鬧鼠王芬係「奴才」，鼠王芬就鬧番民主派議員，雙方嘅罵戰令到會議要暫停。象哥於是就上前勸喻，仲一手搭喺鼠王芬膊頭，一手捉住佢隻手，帶佢離開會議廳。
至於點解Dennis要咁鬧鼠王芬呢？佢就話，建制派明知修訂《逃犯條例》嘅傷害有幾大都仲支持修例，所以就係奴隸。而鼠王芬就話，議事文化係要將不同意見用文明方式表達，人身攻擊並非議員標準，仲話會保留追究權利添。