政情：課程壓力大創意低 實習生向葉建源吐苦水
依家正值實習季節，立法會秘書處都有一班大專實習同學仔，尋日仲同議員傾吓偈添。教育界議員葉建源都有去，仲乘機收集同學對本港教育制度嘅「用家」意見添，唔知呢班用家有冇乘機投訴呢？投訴又唔算嘅，只係覺得壓力大，課程創意低，由細到大都好多考試。
葉指參選立會議員係轉捩點
葉建源就對學生講，其他國家覺得香港成績好，而成績好真係有代價，如果制度可以減少啲壓力就會好好多。外界成日話通識科令學生變得激進，但啲同學仔話，冇咁嘅感覺，其實通識科只係令大家對時事關注多咗，唔會引導大家有特定嘅立場。
今次嘅活動大約一個小時，大會叫議員以「人生嘅轉捩點」作題目講吓，葉就講起當年參選立法會議員係重大轉變，覺得多年關心時政同喺教育工作方面累積嘅經驗，令佢準備好做議員咁話。睇番當年葉臨危受命，突然要參選，唔怪得佢會認為呢個係「人生嘅轉捩點」喇。