中環出更：訪京都考察千年老店 黃傑龍為飲食生意取經
俗語話創業難、守業更難，成為百年老店一啲都唔容易。香港食品委員會日前舉行三十五周年就職典禮，兼頒發「百年食品品牌」等多個獎項，以表揚本地歷史悠久嘅食品品牌多年來作出嘅貢獻。稻苗學會會長黃傑龍（Simon）都經營飲食生意，原來佢有團隊去研究一啲百年品牌點解可以經營咁耐，同埋呢啲百年老店有乜嘢獨特之處。近日佢就同團隊去日本京都考察，仲到訪過一間千年老店，而呢間老店已有一千二百年歷史，認真犀利。
Simon話，佢哋四月時去咗京都七間有過百年歷史嘅老店，而呢間千年老店嘅家族最初係得到僧侶傳授鑄造技術，於是就開始鑄造佛像、兵器等，及至現代已改為售賣金屬製造嘅家居用品。
黃形容該店傳人達「修煉」境界
佢哋同咗呢間千年老店嘅第廿四代傳人見面，Simon話去到對方辦公室，發現對方執拾到好整齊，好似示範單位咁。而佢所知，呢位千年老店嘅傳人仲會親手洗廁所，都令佢好驚訝。佢形容係到咗「修煉」境界。
香港中華總商會副會長李應生家族經營中醫藥，都有一百年歷史。作為第三代嘅佢亦都話創業難，守業更難，而要再創高峰就更加難，認為一間公司一定要打好底先可以向前衝，否則只會過度膨脹，而一個品牌嘅產品亦都要與時並進喎。同場仲有南北行公所主席李歡，同埋獲得「百年食品品牌」獎項、經營海味生意嘅香港海味雜貨商會永遠會長梁泳潮（潮叔）。潮叔話家族生意喺上世紀五十年代經歷過禁運措施，生意唔易做，而當年佢亦唔似一般太小爺，而係由低做起，掃地、洗痰罐一腳踢，做咗六、七年先正式接觸公司業務，直言自己當初都係捱出嚟咁話。
卓妮