中環出更：彭定康又指指點點 被嘲「過晒氣」

肥彭發表文章指港府應宣布《逃犯條例》修訂死亡，同時諮詢大律師公會等，睇吓點處理台灣殺人案，又提到現時特首林鄭月娥係寂寞同困難，政治上已受嚴重傷害。

念念不忘當年做末代港督

對於近期示威者提出多個訴求，包括要求政府成立調查委員會徹查警方濫用武力，向來亂噏當秘笈嘅肥彭亦加以附和，建議港府要公開同獨立調查警方處理示威嘅手法，調查範圍可包括示威者暴力行為，相信調查可以畀到林鄭同社會對話嘅基礎喎。

陳雲生就質疑肥彭係念念不忘當年出任港督，先會抱住港督心態對香港事務指手畫腳。佢又認為，肥彭擔任港督時未處理好逃犯移交問題，冇盡到政治道德責任，先至遺留問題造成今日爭拗，所以過氣嘅肥彭唔應該再就當年未有做好嘅工作指指點點。

卓妮