政情：莫乃光論AI應用亂象 明寸劉怡翔楊偉雄

仲用人手派4000 香港未使驚

Charles話，席間嘅昆士蘭科技大學嘅Monique Mann博士，分享咗澳洲福利部門以AI篩選受惠人士出嘅亂子，佢都覺得Dr.Mann所講嘅係個好有趣嘅個案，但就認為香港仲未有呢個問題，事關政府仍未應用AI，又話一個派四千蚊仲要堅持用人手嘅政府，香港未使驚AI住喎。咁講，擺明係寸財經事務及庫務局局長劉怡翔喇，事關佢負責關愛共享計劃派四千蚊都派到天怒人怨。

莫乃光（右）寸劉怡翔（中）堅持用人手派四千蚊，又話楊偉雄（左）唔明AI嘅重要性。

莫乃光（右）寸劉怡翔（中）堅持用人手派四千蚊，又話楊偉雄（左）唔明AI嘅重要性。

寸還寸，但Charles都話只係講笑啫，然而香港確實落後咗啲，跟住重提早前喺立法會向政府質詢AI政策，指政府當時只係話冇問題，有個人力資源委員會就夠嘞！當然佢對呢個答案係極度質疑喇！

佢又話香港係要向前嘅，要追上國際可解釋人工智能（Explainable AI）嘅潮流同監管需要係非常重要，香港唔可以繼續為研發而研發，政府花百億港元畀外國大學、外國同內地大企業做研究，自己就完全唔用，亦唔明白政策研究嘅重要。佢寸緊邊個？當然係創新及科技局局長楊偉雄喇！