政情：惡鬥游蕙禎 植潔鈴道歉寸嘴
因宣誓風波而被褫奪立法會議席嘅青年新政游蕙禎，前日喺網上公布遭有「小花」之稱嘅東區區議員植潔鈴盜用相片，更公開埋對話錄音證植潔鈴認衰。不過，事件去到尋日仲有下文，兩女再度出手交鋒。
暗指游潛水多時
話說植潔鈴喺尋日凌晨拍片回應，解釋話玩通訊軟件Telegram唔用真名同真相係常識，揀相時好好彩揀中游蕙禎，重申自己唔知係游而向佢道歉。不過，話鋒一轉就笑住話游蕙禎已有一排無露面，暗寸佢潛水多時而唔認得佢，又話張相如網民所言，似某位男演員咁Man，說話相當有骨喎。
至於游蕙禎都唔係省油嘅燈，佢就喺Facebook話建制派淪落到同本土派道歉係陰功，仲話下次唔好咁話，更叫對方做「游區議員」添！