政情:財會加鐘批撥款 議程排序爭崩頭

立法會每年七月都會放暑假,但近年愈來愈多議程積壓,財務委員會幾乎年年都要加會「開快車」。

財委會主席陳健波(波哥)經過多日來研究同作廣泛諮詢,尋日終於扑錘決定加會三十七小時,仲苦口婆心呼籲各黨派放低政治爭議,攜手處理民生項目,唔係啲項目起碼遲四個月先攞到錢嘞。立法會各黨派就議程排序已「大打出手」,據悉政府內部競爭亦十分激烈,各部門都想盡快攞錢推出項目免得遭人口實話歎慢板喎。

料人工島研究撥款押尾

查實議程塞晒車,波哥早就計劃加會,早喺四月已率先發信諮詢議員可以加會嘅時間,之後就《逃犯條例》修訂搞到立立亂,多次會議唔係被泛民搗亂,就係被迫取消,項目就繼續愈積愈多。波哥尋日本來邀約民主派議員會面傾吓,希望達成共識盡快處理無爭議項目,但對方竟然回應一句「Not necessary(不需要)」,聲稱會交一份民主派議員建議嘅排序喎。

波哥認為已經不能再等,宣布連同現有十二小時會議未開,喺下月二十日前,合共召開四十九小時會議,希望處理到政府本年度提交嘅四十四個項目。佢亦坦言面對政治現實,已向政府表明唔想具爭議項目放前阻礙其他撥款,相信中部水域人工島相關研究撥款會擺最後,盡量做得幾多得幾多。

殺豬隻補水未納入議程

據了解,政府有幾個項目想喺暑假前攞到錢,包括四間醫院重建工程、公營小學校長及副校長薪酬、公務員加薪等,但仍未排上議程嘅項目包括二百億元置業作福利設施,甚至為非洲豬瘟銷毀豬隻提供財政承擔等,各政策局都向政務司司長張建宗積極爭取排較前位置,唔爭崩頭先奇。

民主派方面,有消息指佢哋唔想同建制派碰頭,避免兩陣營喺目前反修例困局中一齊出現,而且公務員加薪撥款包括警務人員加薪,擔心批出撥款後,市民對警方不滿轉向議會,既不能分拆項目,又不能輕易通過,議員同樣兩面做人難。至於建制派嘅目的就較為明顯,當然想為目前社會撕裂降溫,想焦點轉至民生事務上,但綜合多方消息,大部分建制派議員喺下月二十日後,已安排行程陸續離港,所以波哥只能喺下月二十日前盡量加會。

表面睇,可能純粹議程排序,背後各懷鬼胎,到底批到幾多撥款?會唔會陰溝裏翻船?未到最後一刻都唔會有答案嘞!

第一手消息請下載on.cc東網iPhone/iPad/Android/Windows Phone Apps